Frétt

11. júlí 2016

Stefnir lýkur fjármögnun á 12,8 milljarða framtakssjóði

Stefnir hf. hefur lokið fjármögnun á 12,8 milljarða framtakssjóði, SÍA III. Hluthafar í sjóðnum eru um 40 talsins og samanstanda af lífeyrissjóðum, tryggingafélögum og öðrum fagfjárfestum. Stefnir hefur verið leiðandi í framtaksfjárfestingum á undanförnum árum og hafa sjóðir í rekstri Stefnis ásamt meðfjárfestum komið að fjárfestingum fyrir yfir 40 milljarða í íslensku atvinnulífi. SÍA III er stofnaður í framhaldi af af SÍA II sem hefur á síðastliðnum árum fjárfest í Skeljungi, Festi, Verne Global og Kynnisferðum.

SÍA III mun fjárfesta í hlutafé óskráðra fyrirtækja með það að markmiði að taka þátt í uppbyggingu, vexti og virðisaukningu þeirra. SÍA sjóðirnir hafa á undanförnum árum gegnt mikilvægu hlutverki við að miðla fjármagni og styrkja rekstur þeirra fyrirtækja sem sjóðirnir eru hluthafar í. Þá hafa sjóðirnir tekið þátt í í uppbyggingu hlutabréfamarkaðar hér á landi, en SÍA sjóðirnir hafa komið að skráningu tveggja félaga í Kauphöll og undirbúningur er hafinn fyrir skráningu Skeljungs.

„Við erum mjög ánægð með það traust sem viðskiptavinir okkar, bæði þeir sem hafa fylgt okkur á síðustu árum og þeir sem nú bætast í hópinn, sýna okkur með þátttöku í SÍA III. Framundan eru miklar fjárfestingar í íslensku atvinnulífi og stefna SÍA III er að vera virkur þátttakandi í því að styðja við og efla íslensk fyrirtæki til að gera þeim kleift að nýta þau tækifæri sem eru til staðar og takast á við breytingar í sínum rekstri“, segir Arnar Ragnarsson, forstöðumaður sérhæfðra fjárfestinga hjá Stefni.

Stefnir er dótturfélag Arion banka og stærsta sjóðastýringarfyrirtæki landsins með um 400 milljarða króna í virkri stýringu. Hjá Stefni starfa 22 sérfræðingar í fjórum teymum við stýringu á fjölbreyttu úrvali verðbréfa-, fjárfestingar- og fagfjárfestasjóða. Einnig stýrir félagið eignum nokkurra samlagshlutafélaga sem stofnuð hafa verið í kringum framtaksfjárfestingar. Hlutverk félagsins er að stýra fjármunum í eigu viðskiptavina með hagsmuni þeirra að leiðarljósi. Stefnir þjónar jafnt einstaklingum sem fagfjárfestum. Félagið var stofnað árið 1996.

Til baka

Fleiri fréttir

13.september 2017

Stefnir með bestu eignastýringu á Íslandi

Stefnir hefur verið verðlaunaður af breska fagtímaritinu World Finance Magazine fyrir bestu eignastýringu á Íslandi á sviði skuldabréfa. Í umsögn um verðlaunin...

04.september 2017

Nýr starfsmaður í skuldabréfateymi Stefnis

Sævar Ingi Haraldsson hefur verið ráðinn sem sjóðstjóri í skuldabréfateymi Stefnis. Sævar hefur frá árinu 2015 unnið hjá Fossum mörkuðum hf.

02.ágúst 2017

Stefnir – Erlend hlutabréf -ISK og -EUR og Stefnir – Scandinavian Fund sameinast

Verðbréfasjóðirnir Stefnir – Erlend hlutabréf –ISK og –EUR og Stefnir – Scandinavian Fund verða sameinaðir þann 31. ágúst nk. undir nafni síðarnefnda sjóðsins...